Біргеміз - берік іргеміз!

Гүлсім Жарылғасова, "Жетібаймұнайгаз" өндірістік басқармасы, қабат қысымын ұстау цехының 2-санаттағы геолог маманы:

"Осынау қиын кезеңде ауызбіршілікте болуымыз өте маңызды. Жұмыста жүріп бас офистен  келген бетперде туралы хабарламаны естідім де, кешке үйге барғасын тігуді бастап кеттім. Талаптыға нұр жауар деген, соның арқасында кеше 200-ден астамын тапсырдым. Маскалар өте сапалы, екі қабатты. Мұны үтіктеп, жуып, қайтадан тағуға болады. Бір рет тағып, лақтырып тастайтын емес, ұзақ пайдалануға болады", –дейді Гүлсім апай.

Мұнайды жоғары көтеру үшін күнделікті жер астына су айдау қызметін бақылайтын маманның, қазіргі таңда тігіншілік өнері де Қоғам игілігі үшін олжа болып тұр. Маңғыстау мұнайының қарашаңырағында 30 жылдан астам еңбек етіп келе жатқан Гүлсім Жарылғасыова ұжымды бірлікке шақырды.

Гүлназ Сәрсенғалиева –материалды-техникалық қамту базасының стажеры:

"Елдегі төтенше жағдай кезінде бос отырмай, қолымнан келген көмегімді аямауға тырысып жатырмын. Медициналық бетперделер жетпей жатыр. Әсіресе, кенорындарымызда жұмыс жасайтын қызметкерлеріміздің қорғану құралдары толық болғаны өте маңызды. Осы уақытта сәл де болса, үлес қоссақ деймін. Бұл жұмыстарды жалғастыра беремін. Тілегім ел-жұртымыз тыныш болып, елімізде тезірек жаймашуақ күндер орнаса екен", дейді Гүлназ. Өзі көп балалы ана, қазіргі таңда 4 баланы бағып, бала күтімімен үйде отыр.

Айгерім Хожанова – әкімшілік-әлеуметтік департаментінің стажеры:

"Коронавирусқа қарсы күресу, ұлт қауіпсіздігін сақтау - бәрімізге ортақ міндет. Осындайда әрбір азамат жауапкершілікті сезінуі тиіс. Негізі тігу қолымнан келмейтіні рас, бірақ жылдар бойы тігіншілікпен айналысатын енем бір рет көрсетіп бергеннен кейін  алып кеттім. Барлығы да ниетке байланысты екен. Бүгінге дейін 300-ден астам бетперде тігіп тапсырдым. Осы орайда "қолақы" төленуі де біз сияқты үйде отырған аналарға үлкен стимул екендігін атап өткім келеді", дейді Айгерім.

Бүгінгі таңда "Маңғыстаумұнайгаз" АҚ қызметкерлері он мыңнан аса бетперде дайындап, тапсырды. Бұл орайда, ізгілікті іске бастамашы болған әкімшілік-әлеуметтік мәселелер департаментінің стажеры Анар Нұғманованың да еңбегін атап өткен жөн.

Әлемдік індеттің дауасы әлі табылған жоқ. Бірақ сақ­танудың жолдары бар. Ол – үйде оқшаулану. Сон­дықтан вирусты жеңу үшін әркім өз үйімізде болайық!

Альбина Әтен